മുലയൂട്ടുന്ന അമ്മമാർക്കായി..

പ്രസവിച്ച ശേഷം ആദ്യം വരുന്ന കട്ടിയുള്ള പാൽ കുഞ്ഞിന് വളരെയധികം ഉപകാരപ്രദമായ കൊളസ്ട്രം അടങ്ങിയതാണ്. അത് ഒരു കാരണവശാലും പാഴാക്കരുത്. ഏറ്റവും അധികം പോഷകങ്ങൾ അടങ്ങിയതാണ് ആ പാൽ. അത് നിർബന്ധമായും കുഞ്ഞിനെ കുടിപ്പിക്കണം.

പ്രസവിച്ചു കഴിഞ്ഞ് ആദ്യത്തെ രണ്ടുമൂന്നു ദിവസങ്ങൾ പാല് കുറവായിരിക്കും. പിന്നീട് പാലിന്റെ അളവ് കൂടിവരും. 

ആദ്യത്തെ ആറുമാസം വരെ കുഞ്ഞിന് മുലപ്പാൽ മാത്രമേ കൊടുക്കാവൂ. 

ഡോക്ടർ നിർദേശിക്കുകയാണെങ്കിൽ വിറ്റാമിൻ D3 drops കൂടി നൽകാം. വിശ്വാസങ്ങളുടെയും ആചാരങ്ങളുടെയും പേരിൽ തേൻ, വയമ്പ്, സ്വർണം എന്നിവയൊന്നും കുഞ്ഞിന് അരച്ച് നാവിൽ വെച്ചുകൊടുക്കരുത്.

മുലപ്പാൽ രണ്ട് തരത്തിലുണ്ട്.

 ഫോർമിൽക്കും ഹിൻഡ് മിൽക്കും.

ഫോർമിൽക്ക്. 

 മുലയൂട്ടുമ്പോൾ ആദ്യം വരുന്ന പാൽ ആണ് ഫോർമിൽക്ക്. ആദ്യം വരുന്ന പാലിൽ വെള്ളവും , പോഷകങ്ങളും മിനറലുകളുമാണ് കൂടുതലുള്ളത്. കുഞ്ഞിന്റെ ദാഹം മാറ്റാനുള്ളതാണ് ഈ പാൽ. 

ഹിൻഡ് മിൽക്ക്.

ഫോർമിൽക്കിന് പിന്നാലെ  വരുന്നതാണ് ഹിൻഡ് മിൽക്ക്. കുഞ്ഞിന്റെ

വിശപ്പില്ലാതാക്കാനും, മസ്തിഷ്ക്കത്തിന്റേത് ഉൾപ്പടെയുള്ള ശരീരവളർച്ചക്കും ആവശ്യമായ കൊഴുപ്പ് ഹിൻഡ് മിൽക്കിലാണ് കൂടുതൽ അടങ്ങിയിരിക്കുന്നത്. 

ഒരു സ്തനത്തിലെ പാൽ മുഴുവനായും കുടിച്ചുകഴിയുമ്പോൾ മാത്രമേ കുഞ്ഞിന് ആവശ്യമായ പോഷകങ്ങളെല്ലാം ലഭിക്കൂ. ഒരു സ്തനത്തിലെ പാൽ കുറച്ചു കുടിപ്പിച്ചിട്ട് അടുത്ത സ്തനത്തിലെ കുടിപ്പിച്ചാൽ ദാഹമകറ്റാനുള്ള ഫോർമിൽക്ക് മാത്രമേ ലഭിക്കൂ. വളർച്ചയ്ക്കും വിശപ്പകറ്റാനുമുള്ള ഹിൻഡ് മിൽക്ക് ലഭിക്കില്ല. അതിനാൽ ഒരു സ്തനത്തിലെ പാൽ മുഴുവനാക്കാതെ അടുത്ത സ്തനത്തിലെ പാൽ കുടിപ്പിക്കരുത്.

ശ്രദ്ധിക്കുക: 

ചില മാതാപിതാക്കൾ കുട്ടികൾക്ക് ഫോർമുല ഫീഡ് കൊടുക്കാറുണ്ട്. ഇത് ഡോക്ടറുടെ നിർദേശപ്രകാരം കൃത്യമായ അളവിലായിരിക്കണം നൽകേണ്ടത്. സ്വന്തം ഇഷ്ടപ്രകാരം നൽകരുത്..